Onze Hoofdsponsoren
Natuurlijk kan de Nachuule niet zonder haar trouwe sponsoren!
Dagboek Prins Jacques I en Prinses Diana I
WIE UT ALLEMOAL BEGONNE IS
Op moandig 24 juni 2024 woar ut fies! Jacques is 50 joar gewoare. Om dat te viere woare veer met de familie Stiene gezellig een hepke goan eate. De ganse daag woerd Jacques al gebeld en geappt om um te feliciteren. Met dank aan os vrung wis gans Beekdaelen dat Jacques 50 gewoare woar omdat os ganse hoes aan de veurkant woar verseerd. Om 19:11 oer ging weer de telefoon. Inne Richard aan de lien, de verbinding woar te slecht om un zinnig gesprek te veure. Jacques sproak aaf om truck te belle. Einmoal toes es de kinger op bid loage hubbe veer ut nog euver dat ein telefoontje van Richard. Dat woar dea van Luijten, woa zou dea noe veur belle? Missjien veur te feliciteren? Of toch veur get gans anges?
In deas weak heije ver un fiesweak, de 25e sind veer ‘ stiekum’ getrouwd en de 26e waor de verjaordag van Diana. Ut is dan auch pas donderdig de 27e es ver Richard truck belle. En dan koam de vroag: “wilt geer ut nuuje Prinsepaar van de Nachuule weare?! Joa natuurlik wille veer dat! Wat een ier om hie veur gevroag te weare!
Op moandag 8 juli hubbe veer op een geheime locatie os ierste gesprek mit de ‘hypotheek adviseur’ Richard (tja ver moste toch get teage de mam zigge voor t oppasse). Richard vertilde os aan de hand van ut dreajbook alle ins en outs euver wat ut inhilt om Prins en Prinses van ut Nachuuleriek te kinne zeen. Genog om euver noa te dinke en veural om te kieke of veer dat met ut wirk en de kinger gereigeld kriege. Mit ut wirk hubbe veer ut verrassend snel gereigeld (ut helpt natuurlik waal es de chef zelf auch oeit Prins is gewaes ) Dan de kinger nog. Dat is nog ummer effe aafwachte omdat veer ut natuurlik aan nemes kinne vertille. Veer goan er mer van oet dat de mam de kinger geer een paar weekende op bezeuk heat.
Noa ozze vakantie hubbe ver de knaup doergehakt en noame veer rond 11 augustus om 11:11 oer contact op mit de Opper Uul om te vertille dat ver met veul spass en plezeer ut Prinsepaar van 2025 willen weare. Op donderdig 22 augustus rond 19:11 oer wurd ut dan echt officieel, ut contract wurd geteikend en kint ut leage en ut verzwieche beginne.
Vanoet de vrung weare ver al un aantal jaor es Prinssepaar gezeen mer dit joar liekt ut nog erger dan de anger joare. Op fieskes en bie de Veterane van de Minor wurd Jacques al es de nuuje Prins onthoald. Gelukkig kint Jacques doa waal good op anticiperen en heat er ummer een antwoord kloar. Hea wit er zelfs mit un widdeschap un aantal vaate beer oet te sjleipe, benuujd of ver die auch echt gont kriege.
In de tied tot aan de Keasjmes volgen nog een sjtuk of 11 afsproake mit de ‘hypotheker’, ‘verzekeringsagent’ en une ‘collega’. Jeders kier weer op een geheim locatie. Veer motte aan de slaag mit de medaille, de proclamatie tekst, os persoonlik verhoal, de kleijer, de steek, de muziek en nog 111 anger dinger.
Op 11 oktober rond 11:11 oer is het tied om te shoppe. Ein pak veur de prins en een kleid veur de prinses. Jacques kriet in precies 11 minuten un perfect passend 3 deilig kostuum aangemete. Nog neet ierder woar hea zoe snel veerdig mit shoppen. Dan doer veur ut kleid, de perfecte jurk wurd noa 1 oer en 11 minuten auch gevonge.
Op 21 oktober sind veer same mit vrung bie de Kolsche oavond van het Oktoberfest in Zitterd. Jacques kump aan de kahl mit get manne oet Duutschland en wat bliek noe, dea groep woar van un Duutsche fiesband ‘Hatwat’. De daag der noa kreeg Jacques ut repertoire, noadat er ut telefoonnummer hei oet gewisseld, van os favoriete Kolsche muziek doergestuurd. Jacques zou Jacques neet zin es er hie geine deal oet wit te hoale. Dizze band kump hun debuut in Limburg make tiedens ozze receptie! Wie sjiek is dat! Ze wille naamsbekindheid kriege in Limburg.
Op 2 november is ut dan tied om de steek aan te meete en een kreuntje te keeze. Hieveur goan ver samen met Richard noa Salon Roger in Maaseik. Ongeleufelijk wat een keuz aan kleure, modelle stiksels en patroene! Maar dan ut dilemma… goan ver veur zilver of goan ver veur goud? Goud natuurlik!
Veer heie geluk dat ver dean daag es ierste koppel een aafsproak heije want er woare 2 verkaupers krank en de dame in de zaak kreeg ut neet gereigeld met alle afsproake die noa os gepland stinge. Ut leep doa allemoal in het 111…
Noa 111 mails en telefoontjes is op 11 november dan eindelik ut definitieve ontwerp van os medaille kloar en goodgekeurd. Op 11 december rond 11:11 oer zint ze bie os toes aafgeleiverd en wat zind se sjiek gewoare!
Op 2 januari 2025 woar ut tied om de foto van ut nuuj prinsepaar van de Nachuule te make. Veur het iers in volleidig ornaat omgetuiverd tot Prins en Prinses van de Nachuule. Wat un geveul. Dan begint ut pas ech te kriebele. Veur ut iers dat veer er same der zoe sjiek opstoan! In 11 minuten zind ver 111 flitse verder en is ut dan toch gelukt om os vas te ligge.
Op 9 januari hubbe ver un aafsproak mit de Upperuul van de Nachuule en Leon Bosch, road van elf lid, en une gooie vrunk van Jacques. Ut woar auch tied om unne vertrouwenspersoon binnen de familie in te lichte. Mit een smoes hoale veer Dominique, de broer van Jacques, noa de geheime locatie woa he dan Leon en Richard zal treffen. Onger ut mom van autopech vroage veer of Dominique Jacques kint komme ophaole bij de geheime locatie. Dominique woerd geappt ‘Vroag mer noa Leo’. Dominique belt aan en Richard (auch in t complot betrokke) mak de duur ope. Ich kom miene broor hoale ich mos noa Leo vraoge. En dan koam doa Leon aan de duur. De hiere stonge ff wie een uulke noa ein te kieke veur dat de 11 cent veel. Missie geslaag !
Op 11 januari stonge veer om 11:11 uur bie de drankehandel om get in te sloan veur de doars te lessen. Meh ja zoveul beer om oet te keze en wie zit dat mit de koppeling van de tap?? Advees woar nuudig en der is mer einne die ech alles van beer aaf wit en dat is de pap van Diana, alias der bier und partymeister oet gebrook… Voor het juuste advees toch mer ff os ‘grote geheim’ motte onthullen.
11 januari 7 daag veur het groete moment waor ver noe stiekem toch echt neet mier op kinne wachten. Alles veerdig en gereid om de sjunste vasteloavend van os leve te viere. Mer der woar nog ein obstakel… Gans Nuth woar inmiddels bedik met un dieke loag snie. En veer hubbe ut plan om der een tuinfeest van te make.. (waal get te optimistisch in januari mer good onger het motto slecht weer besteit neet mot dat toch kinne ) zoot er dus nieks angers op dan 11 cm snie van ut graas aaf te schuuve.. Es de buure dat gezeen hubbe zulle auch wel dinke de buuf heat ze neet mier alle 111… Noe mer haupe dat ut zondig dreug bliet!
Noe veer mit en mit alles veerdig en geregelid hubbe kump de proclomatie auch steeds dichter bie.
Spannend, sjiek en ech get om noa oet te kieke! Wat zulle de kinger, de familie en os vrunj opkieke! Veer kinne noe neet mier wachte tot ut eindelijk zo wiet is!
DE PROCLAMATIE 18 JANUARI 2025
Zoaterdig 18 januari 2025, eindelik woar ut zoe wiet, de daag woar veer al een half joar mit bezig woare. De sjpanning begos bie Diana noe toch echt op te laupe, de knot van os dansmarietje Eva kreeg ut dan auch te verdoere. Wiej alles tot dees daag netjes volgens plan verleep, leek vandaag alles in ut 111 te laupe. Ut Eva waor krank en loag mit koorts, 39+, op de bank. Jacques heij tog mer eave mit de Nightcare gebeld om te vroage welke mediciene veer maximaal koste toedene om her veur dizze oavend tog op de bein te haute. Dan os leef vrung… Die heije natuurlik allemoal anger planne dan gezellig mit os noa de proclamatie te goan… Diana hey de oavond van te vuure nog getrach mit diverse hints in eeder geval Claudia en Cindy nog noa ut trefcentrum te bewaege mer de 11 cent veel helaas neet bie ze..
Teage 19 oer 11 woar ut dan eindelik tied om noa ut trefcentrum te goan veur ut optreaje van os dansmarietjes. Gelukkig stinge ver neet allein en toch heije get vrung de weag nao ut trefcentrum gevonge. Rond 20 oer 11 woar de onthulling van ut jeugdprinssepaar. Veur os natuurlik auch spannend want veer heije nog gein idee wea dat zou weere. Prins Stijn de 2e en Prinses Vajen de 1e!! Wat geweldig sjiek!! Os kinger mochte van Stijn op de buun kome om une medaille in ontvangst te numme en blie verrast dat se woare! En dan moos de echte verrassing nog komme!
En dan… sleijt de klok 21 oer 11 en is ut dan toch ech tied om ut groete prinsepaar van 2025 bekint te make. Ze stonge achter ut scherm op de buun.. Toch? Of neet? Van achter un scherm woerd op de hints van de opperuul diverse veurwerpe aangegeave die allemoal met ut nuuje Prinsepaar te make heije.
Jacques en Diana stonge vol spanning samen mit de vrunj noa ut spektakel op de buun te kieke.. (Stiekem waal mit une hartslaag van 311..) Ein van de letste hints woar un pleatje van une stormparaplu.
Op dat moment reup ein van os Vrung: dat is euche hond! Waarschienlik heat ut gezich van Diana de kaarte verroaje mer op dat moment keem Richard al met de volgspot de zoal in en koam er snel ozze kant op en reep ”leef luuj ich zal uch neet langer in spanning haute, loat ich euch veurstille aan Prins Jacques de ierste en Prinses Diana de ierste”! Wat un moment! Die ontlading, de reactie van os kinger, de vrung, de zoal, ut woar gewoon fantastisch en neet te beschrieve!
En dan de buhn op en snel omkleije achter dat roed geel greun wendje… veer kinne euch zigge… dat is al un oetdaging anzich.. mer in get minder dan 11 minute woar ut gelök en woerd ver nog eine kier, mer dan noe waal vanachter ut wendje oetgeroape tot ut nuuje Prinsepaar van Nuth. Noa ut decoreren trapte veer af mit os proclamatietekst.
Vasteloavend 2025 in het Nachuuleriek is begonne!! Alaaf, Alaaf, Alaaf!!
Zondig 19 januari 2025 sting in het teike van kinnismake mit ut Prinssepaar en de Uule. Veur dit moment heije veer auch vrunj en familie oetgenuudigd. Mer jah.. de tent moos nog opgezat weare, de verseeringen opgehangen en neet te vergeate ut vaat mos aangesloate weare. Om dat allemoal veur 12 oer gereid te hubbe stonge om 9 oer 11 al un stuk of 11 Uule op de sjtoep. Wiej un geoliejd machiene wurd de fiestent opgeboewd en 1 oer 11 later woar alles veerdig! Gezeen de temperatoer van rond het vreespunt heij de Glühwein in dees setting neet misjtange mer helaas heije veer dat neet bie de inkaup ingecalculeerd. Mehr good van schoenkele kriege veer ut auch lekker werm. En de soep van Prins Jacques den ierste (recept van Reg Slechtreem) veel hiedoer extra good in de sjmaak. 111 koppe koffie, tie en 4x 11 liter beer woar het ierste wiekend ten einde. Ut is noe al zoe gaaf en de opperuul head os beluif dat ut allein mer sjieker geite weare, veer hubbe der zin in!
Dan is ut moandig 20 januari 2025, de ierste daag weer truck in ut ‘normale leave’ weare0 veer op straot en op ut wirk feliciterend onthoald. Zoe sjiek al die enthousiaste en hartverwermende reacties, 1111 belletjes, appjes, berichte , kaarte en felicitaties, ut kint neet op! Auch ut pliesieburo in Brunssum en Echt zind de komende 6 weake neet blauw mer Roed, geel en greun gekleurd! Wie sjiek is dat!
Om ut pleatje kompleet te make hubbe veer dizze oavend un fotoshoot mit ut jeugdprinsepaar zoedat de posters gedruk kinne weare. En veer kinne zigge, die van os twie woare al sjiek, mer dees zind noch sjieker! Op noa ut twieede weekend!
Os twiede wiekend es Prinsepaar
Zoaterdig 25 januari 2025 de daag van de ierste officiele geleageheden. Veer beginne de daag rond 10 oer 11 mit ut bezeuke van de sponsore van de Nachuule en ut euverhandige van de nuuje poster van ut (jeugd)prinsenpaar. Mer wat veul belangrieker is, de sponsors bedanke omdat ze de Nuthercarnaval omerme en un werm hart toedrage. Zonger dees geweldige sponsore en vrundj van de Nachuule is er geine vasteloavend in ut Nachuuleriek. Euveral woerde ver werm ontvange en stong een lekker drenkske en hepke veur os kloar.
Veer heije gans Nuth doerkruuts mer Rob wis gehiel strategisch de Stationstroat te ontwieke. Teage 16 oer 11 kome veer toes aan en zooge dat os hoes ongertussche doer os leev vrung woar omgetouverd tot un waar Vasteloaves palies. Ongeluifelijk sjiek hubbe ze dat gemak!
In de oavend woar ut tied veur os ierste receptie. Veer mochte Prins Werner 1e, Prinses Manon 1e, Jeugdprins Jarno 1e en Jeugdprinses Caro 1e van CV de Beumerwalders oet Hulsberg de prachtige medaille van de Nachuule oetrieke. Dat ging gepaard mit ein speech van ongeveer 11 minute en 11 seconde zoe wie allein Richard, de Opperuul, dat kin oetbringe. Wat kint dea Richard mit getalle googele zoedat er ummer op 11 oet kumt. Ozze groete dansmarietjes goave doa un sjoen optreaje weg.
Noa de receptie ginge veer noa ut Gala van de Veldkretsers in Wienesroa woar veer onger ut hierschap van Prins Kjeld 1e, Prinses Nina 1e, Jeugdprins Jort 1e en Jeugdprinses Isa 1e getrakteerd woerde op veul spass en plezier en un te gek programma. Ozze eigen Nuther DJ’s Jirre & Jesse woare auch van de partie en hubbe de ganse oavend de sjoenste pleatjes gedreajd. Mer ut hoegtepunt van de oavend woare toch zieker de Tanzende Sterne! Ongeleuifelik sjiek woar die 40 dansende, springende en vlegende dansers op ein podium. Ut woar une lange mer zeer geslaagde daag!
Dan is ut alweer zondig en moage veer es Prinsepaar ut debuut van de Wieze Uule zitting mit make. Ein sjiek initiatief georganiseerd doer de oud Prinse en Prinsesse van ut Nachuuleriek. Eine volle zaal, sjieke artiesten en natuurlik auch os eige dansmarietjes hubbe weer hunne biste kant loate zeen. Mer ut hoegtepunt woar toch waal de truckkier van os eige Nuther Jungs de Twiee Gewaejde! De stum en stimmung hubbe ze nog ummer neet verloare en veer haupe dan auch stiekem dat ze in ut Nachuuleriek vaker ut daak eraf loate goan. De kinger verwaarloosd (gelukkig good opgevange en verzurg doer os vrung) en veer kapotmeuch mer wat hubbe ver weer un sjiek wiekend gehad!
Op noa donderdig 30 januari 2025 woar veer te gast moge zeen bie ut tiende riek.
Ut derde wiekend
Dit wiekend begoste veer al op donderdig. Veer heije un sjiek fieske bie Cafe In gen Dorp woar Prins Petertje van ut Tiende riek es nuuje heerser woerd oetgeroape. Une gezellige bedoeling woar auch veul angere Prinse en Prinsesse bie aanwezig woare. Prins Andre II van D’r Heksenbergse Vasteloavends Verein , une collega van Jacques, woar auch aanwezig. Ut kos natuurlikm neet oetblieve dat de hoesordes oetgewisseld woered. Jacques ontving une Olympisch emaille medaille zoe groet is er.
De vriedig woare veer weer te gast bie Cafe In gen dorp voor os eige pupquiz. Oud Prins Marcel 1e head doa mit zeen lieftallige assistente, oud Prinses Judith 1e, eine schoene aovend van gemak. Helaas leap de Opperuul hie waal un deuk in zien ego op want oud prinsesse Nathalie 1e, Fabien 1e en Esther 1e ginge toch echt mit de winst er vandoer. Mit als hoofdpries de gouwe karaoke microfoon… Veer zint benuujd wie vaak dea nog gebroek wurd…
Dan is ut alweer zoaterdig… mer wat is dat noe?? Un gaat in de planning?? Nieks op ut programma?? Dat kinne veer natuurlik neet loate gebeure dus hubbe veer de Uule en os vrung oetgenuudigd in de Prinseresedentie bie os toes. Veer heije inmiddels auch al de beloafde vate beer ontvangen dus ut woar hoeg tied om die aan te sloan. Mit un wermte kanon, get brenners, une dieke jas en de nuudige percentages alcohol woar ut une gezellige aovend bie os achterum.
Zondig 2 februari 2025 sjtiekem toch wel de leukste dag tot noe, ut Jeugdgala van CV de Nachuule. Veul vereinigingen wiste os gala dit jaor te vinge. Ein sjoen programma mit Maud, os eige dansmarietjes, de Ravotclub, Studio Hellebrand mit os eige Jeugdprinses Vajen 1e en Danny Pouwels makde er un sjoen fieske van. Mer ut absoluute hoegtepunt woar toch waal DJ Energie mit ut confettikanon (leas 20 kier 11 kilo confetti en une blaadblaozer) Nog noejt ierder zoeveul confetti gevonge in os ongergood. 11 daag later vonge veer de confetti nog ummer in os hoes.
Noa dees fantastische daag gaond veer weer eave truk noa os ‘normale’ laeve en kinnen veer weer oetkieke noa ut volgende wiekend! Wat vleug de tied!
Ut veerde weekend
11 kier knippere mit de auge en veer zint alweer euver de hilf van os vasteloavesavontuur. Auch dit weekend hubbe veer weer veul sjpasse en plezeer beleaf.
Op vriedag woare veer mit de Nachuule te gast bie de Pingerhoeve. Onger ut genot van een good glas beer en une culinaire bitterbal hubbe veer de Hollender Martijn en Patricia kinnis laote make mit de Nuther Carnaval. Noa een aantal polonaises hubbe veer hun auch tot vrung van de Nachuule gekroend en de biebehuurende medaille omgehange.
Zoaterdig middag leete veer os Prinse en Prinsesse pekske thoes en reisde veer es pap en mam aaf nao ut Limburgs Kampioenschap Klumpkes Werpe in Zumpelveld om os jeugd Prinsepaar Stijn 2e en Vajen 1e aan te moedigen in dizze zwoare competitie. De aanhang oet Nuth woar groets mer de concurrentie woar sjtevig, oeteindelik is os prinsepaar op une sjoene gedeilde veerde plaats terecht gekome. In de aovend waore veer es Nachuule te gast bie ut Schinoster gala in Schinnen. Un sjoen programma begeleid mit un liveband maakte de oavend compleet.
Prinses Diana 1e haed op dea oavend ( mit de toestummung van Prins Jacques 1e) met dea van euver de brug gedanst. Prins Dusty 1e van de Droepnaze heij de swung er good in zitte. Zoe zuus se mer dat de Vasteloavend ekerein same bringt! Al heerst dat gegeave bie os gaar oets neet.
Zondig 9 februari 2025 , jeugdgala bie de Veldkretsers. Auch hie make ver same mit os jeugd een sjoen fieske van. Hosse, springe en de polonaise weare dan auch massaal gelaupe. Veer hubbe ut toch maar good veur mekaar mit os jeugd! Zoeveul spass op ein veerkantemeeter! Geweun sjiek om mit te make. Al dansend en springend hubbe veer de zoal verloate en kinne veer stiekem neet wachte tot ut weer wiekend is!